ice berg Texnologiya 12-05-2023, 14:30

Akkad mixi yazılarını tərcümə edən SÜNİ İNTELLEKT YARADILDI

Təl-Əviv Universiteti və Ariel Universitetinin tədqiqatçıları Akkad mixi yazılarını ingilis dilinə avtomatik tərcümə edə bilən süni intellekt modeli yaradıblar.

LoaDinG.aZ xəbər verir ki, bu barədə “Arkeo News” məlumat yayıb.

Mütəxəssislər süni intellekt modelinin iki versiyasını hazırlayıblar, bunlardan birincisi akkad dilini latın qrafikasına, ikincisi isə Unicode kodlaşdırmasına çevirir. Latın transliterasiyasından istifadə edən birinci versiya ən yaxşı nəticələri göstərməyi bacarıb.

Alimlər iddia edirlər ki, bu model digər proqramların müasir dilləri tərcümə etdiyi kimi qədim dili də tərcümə edə bilir. Beləliklə, o, Best Bilingual Evaluation Understudy 4 (BLEU4) üzrə 37,47 bal toplayıb və bu araşdırmada ən yaxşı nəticələri verib.

Bu yeni texnologiya qədim tarixin öyrənilməsində inqilab yarada, onu daha əlçatan və daha geniş auditoriya üçün açıq edə bilər. 2020-ci ildə eyni alim qrupu "Babylon Engine" adlı süni intellekt modelini yaradıb, lakin indiki model təkmilləşdirilib və yenidən işlənib.

Qeyd edək ki, akkad dili 2 min ildən çox əvvəl istifadə olunub. Mesopotamiyada danışılan semit dil ailəsinin ölü dili və eyni zamanda ən qədim semit dilidir. Onun danışanları şumerlərdən götürülmüş mixi yazıdan istifadə edirdilər və dilin adı özü də Akkad şəhərinin adından gəlir.

Tarixçilərin fikrincə, indi alimlər üçün qədim Mesopotamiyadan yüz minlərlə gil lövhələri tərcümə etmək daha asan olacaq. Bundan əvvəl mütəxəssislərin sayı məhdud olduğundan onları emal etmək mümkün deyildi.