ice berg Şeirlər 3-09-2023, 22:00

Gözdən düşən ucalıqlar

Qoymadın dünyada qaçan yer mənə

Xəyalın buraxmaz, heç darıxmaram

Sən gələn yolları nişan ver mənə

Sən gedən yollara bir də baxmaram

Sinəmdə dağ çayı - şeirlər coşan

Zirvəsi dumanlı, dərdlər uçuşan

Bahar selləritək bulanıqlaşan

Ruhumu bulaqtək iç aram-aram

Başımda saçımın bəyazısan sən

Ömrümün gecikmiş niyazısan sən

Kərahət vaxtının namazısan sən

Qılsam məkruh olar, qılmasam haram

Gözlərin gözümə zillənib dayan

Dəyişsin cizgilər, yetkinlik əyan

Ürəyim tanıyar, eləyər bəyan

Səni yaddaşımdan heç buraxmaram

Bəxtiyar olarmı özündən küsən?

Qəlbini ovutmaz daha neyləsən

Elə yüksələcəm, sən də görəsən:

Sənsiz gözdən düşən ucalıqlaram

Mirzə Lazım