ice berg Şeirlər 17-12-2023, 20:00

Məzəmmət

Parçalanıb baş-bədən can sökülən o gündən

Çalxalanıb ruhumuz, halımız bərbad tamam

Guya verdilər bizə duzun şəkər yerindən

Heç şirinə bənzəmir ağzımızda dad tamam

Qismətindəki şərrin hər addımı mərazi

Sən usansan da kindən, dayanmır heç əzazil

Vətənini sevməyən aciz olur, yaxşı bil

Əzir yoldan hər ötən, gün olur fəryad tamam

Cənnət üçün ağlayan əcrə gətirmiş pənah

Sən işə bax, inancda necə tutur yer tamah?!

Əlli kərə səcdəyə baş qoyub etsən günah,

Yaxardığın o büt də eyləməz imdad tamam

Haqqı bilən bir aşiq öz nəfsini dayatmaz

İsrafilin suru da dinbazları oyatmaz

Alnıaçıq dik duran şöhrət üçün can atmaz,

Həccə gedənlər üçün hazır olur 'ad' tamam

Unudub ki, hər gələn qəbrə lüt-üryan gedir

Mənafeyi naminə fitrətdən yan gedir

Yalquzağın içində ulartısı can didir,

Xisləti meymun olan öz halına şad tamam

Susuramsa, deyirlər, dünyaya sağır gəlib,

Sanırlar ki, əzəldən dünyaya fağır gəlib

Danışsam, ürəyini qıraram ağır gəlib

Mən və mənim şairim bir-birinə yad tamam

Mirzə Lazım