"Qazaxdan Naxçıvana qədər bufer zona yaratmaq lazımdır" - Hərbi ekspert

Sentyabrın 5-i saat 09:55 radələrində Ermənistan silahlı qüvvələrinin bölmələri Basarkeçər rayonunun Yuxarı Zağalı yaşayış məntəqəsi istiqamətindəki mövqelərindən Ordumuzun Kəlbəcər rayonunun Zivel yaşayış məntəqəsi istiqamətində yerləşən mövqelərini atıcı silahlardan atəşə tutub.

Hərbi ekspert Emin Həsənli Sun.Az -a bildirib ki, bu məsələni həll etməyin yeganə yolu Türkiyənin Suriyada etdiyi kimi Qazaxdan Naxçıvana qədər bufer zona yaratmaqdır.Əks halda Ermənistan öhdəlikləri yerinə yetirməyəcək və belə davam edəcək:

"Azərbaycan xalqı haqlı olaraq heç vaxt Ermənistana inanmayıb. 9 noyabr bəyannaməsindən sonra Ermənistanın üzərinə götürdüyü öhdəliyi yerinə yetirəcəyini zənn edilirdi. Lakin bir qrup şəxs, o cümlədən mən buna inanmırdıq. Hakimiyyətdə kim olursa-olsun, Ermənistanın terrorçu,işğalçı mahiyyəti dəyişmir. Onlar Rusiya, ABŞ, Fransadan asılıdırlar. Bu mərkəzlərin marağını yerinə yetirirlər. Bu məsələni həll etməyin yeganə yolu Türkiyənin Suriyada etdiyi kimi Qazaxdan Naxçıvana qədər bufer zona yaratmaqdır.Əks halda Ermənistan öhdəlikləri yerinə yetirməyəcək və belə davam edəcək. Ermənistan odla oynayır. Başına elə müsibətlər gələcək ki, mövcudluğu sual altında qalacaq".