21 yaşından qlobal şirkətlər onu işə dəvət edirlər - “Google”da mühəndis işləyən Əfsanə

Karyerasına Azərbaycanda başlayır. İlk iş yerində çalışdığı dönəmdə “Google”un işə qəbul mütəxəssisi ona bu şirkətin iş müsahibəsində iştirakla bağlı yazır. Əvvəl razılaşsa da, sonra həyəcanlanır və bir neçə saat qalmış müsahibəni ləğv edir. Azərbaycanda karyerasını davam etdirir. Sonrakı dönəmdə isə “Microsoft”dan təklif gələndə, artıq ölkə xaricində iş imkanını dəyərləndirir və Çexiyaya köçür. Sonra yenidən “Google”dan iş üçün ona yazanda, bu dəfə “yox” demir.

Sun.az  xəbər verir ki, valyuta.az-ın müsahibi “Google”un İngiltərə ofisində mühəndis proqramçı olaraq çalışan azərbaycanlı Əfsanə Kərimovadır.

Qeyd edək ki, Əfsanə Kərimova 1995-ci ildə Qubanın Rustov kəndində anadan olub. 2012-2017-ci illərdə Qafqaz Universitetində (İndiki Bakı Mühəndislik Universiteti) Riyaziyyat və informatika müəllimliyi üzrə bakalavr, kompüter mühəndisliyi üzrə magistr təhsili alıb.

Azərbaycanda Tibb Universiteti, “Kapital Bank” və Mərkəzi Bankda proqramçı kimi çalışıb. Daha sonra Çexiyada “Microsoft”da işləyib.

- Əfsanə xanım, Qubanın kiçik bir kəndində böyüyən balaca qızın o vaxt nə kimi arzuları, xəyalları var idi? Məsələn, “Google”da işləməyi xəyal edirdi?

- Kiçik bir kənddə böyüdüyüm üçün ətrafımda çox təhsilli, yaxud böyük şirkətlərdə işləyən insanlar olmayıb. Yəni, “Google” kimi böyük şirkətlərdən xəbərim olacaq mühit deyildi. Uşaq xəyalımda isə “Öz işim olacaq, şirkət quracam” kimi düşünürdüm. İçimdə “Bir şeylər etməliyəm” kimi hiss var idi. Kənd yerlərindəki insanların çətinlik çəkdiyini görürdüm və sanki “nəsə etsəm, o insanların həyatını rahatlaşdıraram” kimi, düşünürdüm. O, bəlkə də “Google”da işləməkdən daha böyük arzu idi (Gülür).

- Böyük arzuları olan qızın ixtisas seçimi, ali təhsil ilə bağlı nə kimi hədəfləri var idi?

- Mən universitetə müəllim yanına getmədən hazırlaşırdım. Ona görə fokusum oxumaq idi, nələr etməklə bağlı çox düşünmürdüm. Bilirdim ki, riyaziyyatı sevirəm və o sahə üzrə təhsil ala bilərəm. Qardaşım məndən yaşca böyükdür. O mənə Qafqaz Universitetini tərifləyirdi. Ona görə, 10-11-ci siniflərdə Qafqaz Universiteti xəyalı yaranmışdı.