Daha böyük akkumulyatorlu smartfonlar istehsal edilir

"Realme" şirkəti 8000 mAh batareyaya malik smartfonu sınaqdan keçirməyə başlayıb.

Loading.aZ xəbər verir ki, bu barədə "PhoneArena" portalı məlumat yayıb. 

İnsayderlərin fikrincə, "Realme"nin batareya tutumunu artırmaq təşəbbüsü digər Çin istehsalçılarını cihazların muxtariyyətini artırmaq yarışına qoşulmağa sövq edib. Məsələn, "Honor" artıq oxşar batareya ilə orta büdcəli model hazırlayır.

Akkumulyatorun tutumunun artırılması silikon-karbon anodlarının istifadəsi sayəsində mümkün olub. Silikon qrafitdən 10 dəfə çox litium ionunu saxlaya bilir, bu da daha yığcam və səmərəli batareyalar əldə etməyə imkan verir.

8000 mAh batareyaya malik "Realme" smartfonunun flaqman GT 8 Pro olacağı gözlənilir. Orta səviyyəli Honor cihazının stereodinamikləri və "Snapdragon" 7 seriyalı çipi ilə təchiz olunacağı da söylənilir. Bu smartfonların buraxılış tarixləri hələ açıqlanmayıb.

Böyük beynəlxalq brendlər arasında "Samsung", çox güman ki, bu texnologiyanı flaqman "Galaxy S26" seriyasında istifadə edən ilk şirkət olacaq. "Apple" , hələlik, "litium"ion batareyalardan istifadə etməyə davam edərək, bu yeniliklərə daha ölçülü bir yanaşma edib. 

İstehsalçılar 2024-cü ilin sonunda smartfonlarda silikon-karbon batareyalarından aktiv şəkildə istifadə etməyə başlayıblar. Belə batareyaları artıq "Xiaomi 15", "Honor Magic 7 Pro", "Oppo Find X8 Pro" və "Realme GT 7 Pro" təklif edir. Bu texnologiya, məsələn, sonuncuya nisbətən yığcam ölçüləri saxlayaraq 6500 mAh batareyadan istifadə etməyə imkan verib.