Merac hadisəsindən danışılarkən xatırladılan “isra” sözünün mənası nədir?

“İsra” ərəb dilindən tərcümədə gecə səfəri deməkdir. Həzrət Mühəmməd Peyğəmbərin (s) merac gecəsində vəhy mələyi Cəbrailin (ə) müşayiəti ilə, Büraq adlı miniyin tərkində Məkkədən Qüdsə (Məscidül-həramdan Məscidül-əqsaya) səfər etməsinə deyilir. İsra hadisəsi meracın müqəddiməsi sayılır. Çünki bundan sonra Peyğəmbər (s) səmaya qalxmış və merac hadisəsi gerçəkləşmişdir. Qurani-Kərimin “İsra” surəsinin (17-ci surə) ilk ayəsində bu hadisə təsvir edilir: “Bəzi ayələrimizi göstərmək üçün bəndəsini (Peyğəmbər əleyhissəlamı) bir gecə (Məkkədəki) Məscidül-həramdan ətrafını mübarək etdiyimiz (bərəkət verdiyimiz) Məscidül-əqsaya (Beytülmüqəddəsə) aparan Allah pak və müqəddəsdir. O, doğrudan da, (hər şeyi) eşidəndir, görəndir!”