İkinci Dünya müharibəsinin iştirakçısı: "Məqsədimiz düşmənə bir qarış torpaq verməmək idi"

"Müharibə zamanı SSRİ-nin tərkibində olan bütün xalqlar, millətlər faşistlərə qarşı qəhrəmanlıqla döyüşürdülər".

Loading.Az bildirir ki, bu fikirləri Oxu.Az-a müsahibəsində İkinci Dünya müharibəsinin iştirakçısı Qaflan Ömərov deyib.

Müsahibəni təqdim edirik:

- Qaflan müəllim, ömrünüzün neçənci ilindəsiniz və harada dünyaya göz açmısınız?

- 1924-cü ildə Quba rayonunun Ərməki kəndində doğulmuşam.

- Müharibəyə yollananda neçə yaşınız var idi?

- 1942-ci ildə SSRİ ilə Almaniya arasında başlayan müharibəyə könüllü olaraq qatılmışam. 18 yaşım tamam olmamışdı, könüllü cəbhəyə yollandım. Ön cəbhədə vuruşmuşam.

- Bəs hansı sahədə çalışmaq istəyirdiniz?

- Prokuror olmaq istəyirdim. Lakin müharibə alovlanandan sonra döyüşə qatılmalı oldum.

- Sizin kimi müharibəyə qoşulanlar çox idi?

- Bəli, İkinci Dünya müharibəsində faşistlərə qarşı döyüşən vətənpərvər azərbaycanlılar çox idi. Bəzilərinin adlarını unutmuşam. Müharibə zamanı SSRİ-nin tərkibində olan bütün xalqlar, millətlər faşistlərə qarşı qəhrəmanlıqla döyüşürdülər.

- Bəs amalınız nə idi?

- Biz torpaqlarımızı işğal təhlükəsindən qorumaq üçün döyüşürdük. Məqsədimiz düşmənə bir qarış belə torpaq verməmək idi.

- Uğurlu hərbi əməliyyatların sirri nə idi?

- Əsas sirr hər kəsin ortaq amalının olması ilə bağlı idi. Hamı eyni məqsəd üçün mübarizə aparırdı.

- Döyüşdə göstərdiyiniz hünərə görə neçə dəfə təltif olunmusunuz?

- Dəfələrlə təltif olunmuşam. 24 orden-medalım, 100-dən artıq fəxri fərmanım var. Ümummilli lider Heydər Əliyev mənə Bakıda ev, maşın verib, Prezident İlham Əliyev isə hər il pul mükafatı verir.

- Müharibədə hansı çətinlikləri görmüsünüz?

- Müharibə özü elə çətinlikdir. Bəzən yemək-içmək tapa bilmirdik, qaranlıq yollarda irəliləyirdik. Hər anımız təhlükə idi. Başımızı belə ehtiyatla qaldırırdıq.

- Yaralanmısınız?

- 1943-cü il martın 6-da ağır yaralandım. Bir müddət hospitalda müalicə olundum və Qubaya qayıtdım.

- Cəbhədən sonra nə işlə məşğul oldunuz?

- Müxtəlif vəzifələrdə çalışdım.

- Neçə övladınız, nəvə-nəticəniz var?

- Altı övladım, 16 nəvəm, 38 nəticəm var.