Gülməcələr

YUXUM GƏLİR

 

Turan balaca, qəşəng bir qızdır. Atası ona çoxlu nağıl danışır. Qızcığaz da bu nağılları öyrənib danışa bilir. Bir gün Turan yatarkən atasına dedi:

-Ata, mənə “Cırtdan” nağılını danış.

-Sən, özün bu nağılı bilirsən, danış, mən qulaq asım.

-Mənim boğazım ağrıyır. Sən danış.

Ata nağılı danışdı. Ertəsi gün Turan yatarkən yenə atasından nağıl istədi. Ata:

-İndi boğazın ağrımır kı, bu gün sən danış.

-Mənim yuxum gəlir,- deyərək qız gözlərini yumdu.

 

BÖYÜK NAĞARA

İri neft çənini görən balaca Turan dedi:

-Ata, nə böyük nağaradır?

 

BACIMIN “ÜÇÜ”

 

Beş yaşlı Turan üçüncü sinifdə oxuyan bacısının “Gündəliyi”ni əmisinə göstərərək:

-Əmi,”5”-lərimə bax.

-Afərin,-əmi “Gündəliyi” vərəqləyir və “3”-ə rast gəlir.

-Ay Turan, bəs bu”3”-ü niyə almısan?

-Əmi, o ”3” bacımındır.

 

DUET

 

Televizorda qadın və kişi müğənnilər eyni bir mahnını duet şəklində ifa edirlər. Onlar özlərini əzib-büzür, mahnının sözlərini anlaşılmaz şəkildə oxuyurlar. Nənə:

-Bıy, başıma xeyir. Bunlar nəyə görə belə edirlər?

Balaca Turan:

-Nənə, biri oxuyur, o biri tərcümə edir.

 

BEŞ YAŞIM

 

Əmisi beş yaşlı Mehridən soruşur:

-Neçə yaşın var?

-Keçən il dörd yaşım vardı. Ad günümdə dayım qızının toyuna getdik. Ad günümü keçirmədik. Ona görə də dörd yaşımda qaldım.

YADIMDAN ÇIXACAQ

 

Birinci sinifdə oxuyan uşaq atasına deyir:

-Ata, dərsimi oxumuşam, qulaq as, danışım.

-İndi mənim işim var. Bir azdan danışarsan.

Uşaq:

-Ay ata, güclə öyrənmişəm. Bir azdan yadımdan çıxacaq.

 

YEKƏ KİŞİ

 

Ata dərslərini çox pis oxuyan oğluna:

-A bala,yekə kişisən, dərslərini oxu.

-Ata, özün deyirsən ki, yekə kişisən.Yekə kişi də dərs oxuyar?

 

LİFTDƏ AĞCAQANAD

 

Doqquzuncu mərtəbədə liftin gəlməsini gözləyirdim. Lift gəldi. Liftdən 5-6 yaşlı bir oğlan düşüb cəld düyməni basdı. Lift aşağıya getdi. Mən hirsləndim:

-A bala, bayaqdan lifti gözləyirəm,nə üçün belə edirsən?

-Əmi, arxamca bir ağcaqanad düşmüşdü. Onu qaytardım aşağıya ki, Sizi dişləməsin,- uşag heç nə olmayıbmış kimi cavab verdi.