Samsungdan çılğın müsabiqə - Ayda 200.000 addım atana ağıllı saat hədiyyə

Cənubi Koreyanın texnoloji şirkəti Samsung yeni “Galaxy Watch 8”i təqdim etmək üçün Hindistanda qəribə müsabiqə keçirir.

Samsung Hindistanda üçüncü illik "Walk-a-thon India" tədbirini elan edib.

Tədbirdə iştirakçılar yeni “Galaxy Watch 8”-i pulsuz qazana və ya sadəcə piyada getməklə 15.000 rupi (təxminən 290 AZN) endirimlə əldə edə bilərlər.

“Walk-a-thon India 2025” (Hindistanda gəzinti marafonu) 2025-ci il avqustun 1-dən avqustun 30-dək keçiriləcək.

İştirakçılar müəyyən edilmiş bir ay müddətində cəmi 200.000 addım atmalıdırlar. Bu addımlar telefon proqramında akselerometr və giroskop sensorlarından istifadə etməklə izlənilir.

Lazımi sayda addımları atmağı bacaranlar sentyabrın 5-dən 30-a kimi “Samsung Members” proqramını yükləyərək öz mükafatlarını tələb edə bilərlər.

Üç iştirakçı tamamilə pulsuz “Galaxy Watch 8” qazanacaq, qalan bütün istifadəçilər isə endirim kuponu əldə edəcəklər.