Ramiz Rövşən - Nərdivan

Hara çıxır bu nərdivan,

Bəlkə yerdən göyə çıxır?
Kimi mahnı deyə-deyə,
Kimi söyə-söyə çıxır.

Kimi basır başımızdan,
Kimi dartır qıçımızdan,
Ən hündürə çıxan adam
Hamımıza yiyə çıxır.

Dırmaşır, hamı dırmaşır,
Adam-adama dırmaşır,
Bizə baxıb tanrı çaşır:
«Bu zalımlar niyə çıxır?!..»

Çıxır qocası-cavanı,
Bir deyən yoxdu: «Dayanın!..
Son ucu bu nərdivanın
Yenə o dünyaya çıxır…»