“iPhone Air”ə rəqib gəldi: "Honor Magic 8 Pro Air”

Honor, Çin bazarında çoxdan gözlənilən yeni smartfonu “Magic 8 Pro Air” üçün təşviqat işlərinə başlayıb.

2025-ci ilin oktyabr ayında satışa çıxarılan “Magic 8” və “Magic 8 Pro” modellərindən sonra bu yeni cihaz seriyaya qoşulur və kompakt gövdədə güclü aparat təmin etməyi hədəfləyir.

Sızdırılan məlumata görə, yeni model çox zərif bir dizayna sahib olacaq, cəmi 6,3 mm qalınlığında və təxminən 158 qram ağırlığında olacaq.

Cihazın ön hissəsində 1,5K ekran dəqiqliyi təklif edən 6,3 düymlük düz OLED ekranın olacağı gözlənilir.

Android 16 əsaslı “MagicOS 10” əməliyyat sistemi ilə qutudan çıxacaq telefon, MediaTekin güclü “Dimensity 9500” çipseti ilə təchiz olunacaq.

5500 mAh batareya tutumuna və 90 Vt sürətli şarj dəstəyinə malik modelin simsiz şarj dəstəyinin olmadığı barədə şayiələr gəzir.

Qara, ağ, bənövşəyi və narıncı rəng seçimlərində satışa çıxarılacağı gözlənilən cihazda həmçinin markanın özünəməxsus telefoto kamera sensoru da olacaq.

“Honor Magic 8 Pro Air”in 17 fevral Çin Yeni ilindən əvvəl “Magic 8 RSR” modeli ilə birlikdə rəsmi olaraq təqdim ediləcəyi gözlənilir.