Moskva-Tbilisi münasibətləri: dialoq hələ də mümkün deyil

Rusiya Xarici İşlər Nazirliyinin rəsmi nümayəndəsi Mariya Zaxarova hazırda Gürcüstanla dialoqun bərpası üçün heç bir ilkin şərtin mövcud olmadığını açıqlayıb.      Sun.Az   xarici mediaya istinadən xəbər verir ki, Zaxarova bu barədə bildirib: "Tbilisi ilə siyasi dialoqun bərpasına gəldikdə isə, təəssüf ki, bunun üçün hazırda heç bir ilkin şərt yoxdur".            

Xatırladaq ki, Rusiya və Gürcüstan arasında diplomatik münasibətlər 2008-ci ildə Moskvanın Abxaziya və Cənubi Osetiyanı müstəqil dövlətlər kimi tanımasından sonra kəsilib. Həmin qərar o dövrdə Mixail Saakaşvilinin rəhbərlik etdiyi Tbilisinin təşəbbüsü ilə verilib.

2012-ci ildə hakimiyyətə gələn "Gürcü Arzusu" partiyası Rusiyaya qarşı ərazi iddialarını rəsmi şəkildə davam etdirsə də, Moskva ilə hava nəqliyyatı və ticarət əlaqələri qurub. Bununla belə, diplomatik münasibətlər bərpa edilməyib.

2025-ci ilin sentyabrında BMT-də çıxış edən Gürcüstan prezidenti ölkənin hələ də 2008-ci il Rusiya-Gürcüstan müharibəsinin nəticələrini yaşadığını bildirib. Daha sonra Mixeil Kavelaşvili abxazlara və osetinlərə müraciət edərək onları "işğalın o biri tərəfində olan xalqlar" kimi xarakterizə edib.