Arıqlamaq istəyənlər üçün gözlənilməz məsləhət

Şorba gündəlik rasionun vacib elementi sayılmır, lakin bu cür yeməklər bədən quruluşuna diqqət yetirən və arıqlamaq istəyən şəxslər üçün faydalı ola bilər.

Bu barədə rusiyalı diyetoloq və nutrisioloq Sofya Kovanova müsahibəsində danışıb.

"Əgər menyuda kifayət qədər su, lif və protein varsa, mədə-bağırsaq sistemi şorbasız da normal fəaliyyət göstərə bilər. Bu komponentlər yetərli deyilsə, şorbalar problemi aradan qaldırmağa kömək edən vasitə rolunu oynaya bilər", - deyə Sofya Kovanova bildirib.

O, şorbaların artıq çəki ilə mübarizədə necə faydalı ola biləcəyini də izah edib.

"Arıqlamaq istəyən insanlar üçün yüngül tərəvəz şorbaları və ya paxlalı bitkilərdən hazırlanan şorbalar (məsələn, mərcimək şorbası, minestrone və ya tərəvəzli toyuq şorbası) daha məqsədəuyğundur. Bu cür yeməklər toxluq hissi yaradır, çəkinin idarə olunmasına kömək edir və həzm sisteminə düşən yükü azaldır", - deyə diyetoloq əlavə edib.