Qocalmağınıza səbəb olacaq tarixin ən uzun filmləri: bir səhnə neçə gün davam edir?

Kino sənəti artıq öyrəşdiyimiz iki saatlıq çərçivələri çoxdan aşaraq fərqli bir ölçüyə keçib.

Loading.aZ xarici mediaya istinadla xəbər verir ki, hazırda tarixin ən uzun filmi hesab olunan İsveç istehsalı "Logistics" layihəsi tam 857 saat, yəni 35 sutka fasiləsiz nümayiş müddəti ilə rekord qırır. Bu qeyri-adi ekran əsəri adi bir addımölçən cihazın Stokholmdakı mağazadan Çindəki fabrikə qədər olan səyahətini real vaxt rejimində izləyiciyə təqdim edir.

Zaman anlayışını alt-üst edən digər nümunələr arasında Helsinkidə bir binanın on il ərzindəki aşınmasını göstərən 10 günlük "Modern Times Forever" və 30 il ərzində lentə alınmış insan portretlərindən ibarət 8,5 sutkalıq "Cinématon" filmi də yer alır. Klassik süjet xətti olmayan bu əsərlər tamaşaçıya hekayə danışmaqdan ziyadə, zamanın axarını hiss etdirməyi hədəfləyir.

Kinonaşünasların fikrincə, bu cür layihələr insanın zaman qavrayışı üzərində aparılan bir növ eksperimentdir. Bu filmlər başdan sona izlənilmək üçün deyil, müəyyən fraqmentlərlə müşahidə edilmək üçün yaradılıb. Onlar öyrəşdiyimiz sürətli montaj texnikaları aradan qalxdıqda, insanın müddət və davamlılıq hissinin necə dəyişdiyini ortaya qoyur.