Sirri qorumağın əhəmiyyəti

1. Sirri qorumağın əhəmiyyəti

Peyğəmbər (ﷺ) buyurdu: "Əgər bir kəs sənə bir söz deyib sonra (ətrafına) boylanarsa (gizli qalmasını istəyərsə), o söz artıq sənə bir əmanətdir." (Sünən ət-Tirmizi 1959, həsən hədis)

2. Təkəbbürün təhlükəsi

Peyğəmbər (ﷺ) buyurdu: "Qəlbində zərrə qədər təkəbbür (lovğalıq) olan kəs Cənnətə girməz." Bir nəfər soruşdu: "İnsan istəyir ki, paltarı və ayaqqabısı gözəl olsun (bu da təkəbbürdür?)". O buyurdu: "Allah gözəldir və gözəlliyi sevir. Təkəbbür isə haqqı inkar etmək və insanlara xor baxmaqdır." (Səhih Müslim, 91)

3. İşçinin haqqı

Peyğəmbər (ﷺ) buyurdu: "İşçinin zəhmət haqqını (maaşını) təri qurumamışdan əvvəl verin." (Sünən İbn Macə 2443, səhih)

4. Ən pis oğru

Peyğəmbər (ﷺ) buyurdu: "Ən pis oğru namazından oğurluq edəndir". Səhabələr soruşdular: "Ey Allahın Elçisi, insan namazından necə oğurluq edər?" Peyğəmbər (ﷺ) dedi: "Rükusunu və səcdəsini tam yerinə yetirməməklə." (Səhih İbn Hibban 1888, İmam Əhməd, 5/310; əl-Hakim, 1/229)

5. Qeybət və Böhtan Arasındakı Fərq

Allahın Elçisindən (ﷺ) soruşdular: "Ey Allahın Elçisi, qeybət nədir?" O buyurdu: "Qardaşının xoşlamadığı bir şəkildə onu xatırlamağındır." Soruşuldu: "Bəs əgər dediyim şey qardaşımda varsa (doğrudursa), necə?" O buyurdu: "Əgər dediyin söz onda varsa, artıq qeybət etmiş olursan. Əgər yoxdursa, onda ona böhtan (iftira) atmış olursan." (Səhih Müslim 2589; Sünən Əbu Davud, 4874)