Unutmusan

Sən çox da denən: "Sevirəm",

Gözlər deyir: "Unutmusan". 

Kəlməbaşı eyham vuran 

Sözlər deyir: "Unutmusan".

Çəkdiyim nədir əlindən...

Zəhər yağır bal dilindən. 

Görüş yerindən silinən 

İzlər deyir: "Unutmusan".

Meylimi sənə salandan

Əl götürdüm şirin candan. 

Bir düz xoşdur min yalandan 

Düzlər deyir: "Unutmusan".

Ürəyimdə boş qoyduğum,

Dəfn eyləyib daş qoyduğum, 

Rahatlıqla baş qoyduğum 

Dizlər deyir: "Unutmusan".

Eyləmisən bağrımı qan,

Mən demirəm, ay unutqan, 

Yarama basdığın şan-şan 

Közlər deyir: "Unutmusan".

Amid FƏRƏCOV