Günah

Günah var, oyatmır yuxudan bizi

Günah var, insanın vicdanın əzir.

Günah var, atılır yetimxanaya 

Günah var, qocalar evində gəzir.

Günah var, ən şirin nəzir payıdır

İnsan dilənçidir, dilənir onu. 

Günah var, şeytan da narazı qalır 

Günah var, Allah da bəyənir onu.

Günah var, yağ kimi cana yayılır

Günah var, ilişir boğazda qalır. 

Günah var, yüz ilin səcdəsi yumur 

Günah var, bir rükət namazda qalır.

Günah var, gecəni səhərə çıxmır

Günah var, gecəyə ağ işıq verir. 

Günah var, insanın eyibin açır 

Günah var, insana yaraşıq verir

Hər kəsə üzməyi öyrədir həyat

Hərə bir günahda boğulub, ölür 

Günah var, yüzillik ömür yaşayır 

Günah var, anadan doğulub, ölür.

Anar Ramazan