“Huawei”dən yeni patent: Şaquli üçqat qatlana bilən telefon gəlir

“Huawei” yeni patentində qeyri-adi dizayna malik smartfon təqdim edib.

Loading.az xəbər verir ki, patent sənədlərinə görə, cihaz iki qatlama mexanizmi vasitəsilə şaquli istiqamətdə üç hissəyə qatlanır və qatlandıqda adi qapaqlı telefonlardan da daha kompakt ölçü alır.

Açıldıqda isə üç hissədən ibarət uzun elastik ekran əldə edilir. Dizaynın əsas xüsusiyyətlərindən biri ekranın S formasında qatlanmasıdır, bu da mexanizmin daha dayanıqlı işləməsinə kömək etməlidir.

Hazırda bu, yalnız patentdir və “Huawei”in cihazı bazara çıxarıb-çıxarmayacağı məlum deyil. Bununla belə, şirkətin qatlana bilən telefonlar sahəsində yeni formalar üzərində işləməyə davam etdiyi görünür.