Avtomobili maksimum sürətə çatdırsanız nə baş verər?

Bir çox sürücü avtomobilinin maksimal sürət həddinə çatdıqda nə baş verdiyini düşünür. Maraqlıdır ki, müasir avtomobillərdə maksimum sürəti çox vaxt mühərrikin gücü deyil, elektron sistemlər məhdudlaşdırır.

Loading.az xarici mediaya istinadən xəbər verir ki, nəzəri baxımdan avtomobil spidometrdə göstərilən həddən daha yüksək sürət yığa bilər. Lakin praktikada təhlükəsizlik və texniki səbəblərə görə buna imkan verilmir.

Maksimal sürəti elektron sistem məhdudlaşdırır

Müasir avtomobillərin əksəriyyətində sürət məhdudlaşdırıcısı mühərrikin elektron idarəetmə blokuna (ECU) inteqrasiya olunub.

Xüsusi sensorlar avtomobilin sürətini daim izləyir. Avtomobil müəyyən edilmiş maksimal həddə çatdıqda elektron sistem mühərrikin gücünü tədricən azaltmağa başlayır.

Bu, silindrlərə ötürülən hava və yanacağın miqdarını azaltmaq və ya elektron qaz pedalının işini tənzimləməklə həyata keçirilir.

Nəticədə avtomobil qəfil dayanmır və ya sarsılmır. Sadəcə daha sürətli hərəkət etmir və sürət artımı dayanır.

Bəzi sürət məhdudlaşdırıcılarını müvəqqəti keçmək mümkündür

Bir çox avtomobildə sükan üzərində yerləşən LIM düyməsi vasitəsilə sürət həddi sürücünün özü tərəfindən təyin edilə bilir.

Belə sistemlərdə qəfil ötmə və ya fövqəladə vəziyyət yarandıqda qaz pedalını sonadək basmaqla müəyyən edilmiş həddi qısa müddətə aşmaq mümkündür.

Bu funksiya təhlükəsiz manevrlərin həyata keçirilməsi üçün nəzərdə tutulub.

Zavod məhdudlaşdırıcısını söndürmək olmur

Bununla yanaşı, avtomobillərdə istehsalçı tərəfindən quraşdırılan elektron maksimal sürət məhdudlaşdırıcıları da mövcuddur.

Bu sistemlər hərəkət zamanı söndürülə bilmir və onların əsas məqsədi mühərriki, transmissiyanı və təkərləri həddindən artıq yüklənmədən qorumaqdır.

Elektrikli avtomobillərdə də eyni sistem tətbiq olunur

Elektrikli avtomobillərdə də proqram təminatı vasitəsilə maksimal sürət məhdudlaşdırılır.

Bunun əsas səbəbi yüksək sürətin batareyanın enerjisini daha sürətlə sərf etməsi və yürüş ehtiyatını azaltmasıdır.

Belə məhdudiyyət həm təhlükəsizliyi artırır, həm də akkumulyatorun daha səmərəli istifadə olunmasına kömək edir.