Tehran: ABŞ İrana zərbə endirsə, regiondakı enerji obyektləri hədəfə çevrilə bilər

İran Fars körfəzi ölkələrini ABŞ-ın İslam Respublikasına qarşı həyata keçirə biləcəyi hər hansı yeni hücumun regionun mühüm enerji infrastrukturuna yönəlmiş cavab tədbirləri ilə nəticələnəcəyi barədə xəbərdar edib.                     Loading.Az                 

xəbər verir ki, bu barədə Reuters agentliyi məlumat yayıb.                  

Agentliyin mənbəsinə istinadən verdiyi məlumata görə, İranın mesajı açıq olub: "Əgər ABŞ İranın infrastrukturuna zərbə endirərsə, Tehran buna Fars körfəzində yerləşən enerji obyektlərini və digər regional hədəfləri vurmaqla cavab verəcək".

Bildirilib ki, bu xəbərdarlıq ABŞ Prezidenti Donald Trampın son bəyanatlarından sonra keçirilən bir sıra yüksək səviyyəli diplomatik təmaslar zamanı səsləndirilib.

Məlumata görə, İranın xarici işlər naziri Abbas Əraqçi Səudiyyə Ərəbistanı, Türkiyə və Qətərin xarici işlər nazirləri, eləcə də Pakistan Silahlı Qüvvələrinin baş komandanı ilə danışıqlar aparıb. O, tərəfləri Donald Trampın mümkün yeni hücum planlarından çəkindirilməsi üçün öz təsirlərindən istifadə etməyə çağırıb.

Əraqçi vurğulayıb ki, İrana qarşı istənilən hücum Fars körfəzi boyunca yerləşən ABŞ aktivlərinə və enerji obyektlərinə qarşı cavab tədbirləri ilə nəticələnəcək.

"Biz cavab verməyə hazırıq. Lakin diplomatik həll yolu regionda daha geniş eskalasiyanın və dağıntıların qarşısını almağın ən effektiv yoludur", - deyə İranın xarici işlər naziri bildirib.