Tramp: İranla qarşıdurmada 18, İraqda 4 500 hərbçi itirdik

ABŞ Prezidenti Donald Tramp İranla qarşıdurma zamanı ölkəsinin verdiyi hərbi itkiləri İraq müharibəsindəki itkilərlə müqayisə edib.

Sun.az xəbər verir ki, Tramp İranla qarşıdurmada 18 amerikalı hərbçinin həlak olduğunu bildirib.

“Biz İranla qarşıdurmada 18 möhtəşəm insanımızı itirdik. Hətta bir nəfərin itkisi belə həddindən artıq çoxdur”, – ABŞ Prezidenti deyib.

Tramp bildirib ki, İraqda isə ABŞ təxminən 4 500 hərbçisini itirib və onun fikrincə, əldə edilən nəticələr hazırda İranla qarşıdurmada əldə olunanlarla müqayisə oluna bilməz.

ABŞ Prezidenti İraqdakı İŞİD-lə mübarizəyə də toxunaraq, terror təşkilatının onun birinci prezidentlik dövründə məğlub edildiyini və Amerika qüvvələrinin İraqdan daha əvvəl çıxmalı olduğunu söyləyib.

Reuters-in məlumatına görə, ABŞ-ın 2026-cı ilin fevralında İrana qarşı başladığı “Operation Epic Fury” əməliyyatından sonra 18 amerikalı hərbçi həlak olub. Onlardan 7-si İraqda həyatını itirib.

ABŞ sentyabrın 30-da İraqdakı son hərbi qüvvələrini də ölkədən çıxarıb. Bununla 2003-cü ildə başlayan və müxtəlif mərhələlərdə davam edən ABŞ-ın İraqdakı hərbi mövcudluğuna son qoyulub.