ice berg Mətbəx 26-07-2023, 11:00

İstilərə sərinlik qatacaq ən dadlı kofe reseptləri

Kofesevərlər üçün mövsümün soyuq və isti olması əhəmiyyətli deyil. Yayın istisində belə özünü kofesiz təsəvvür etməyənlər üçün bir neçə resept var.
Evdə rahatlıqla hazırlaya biləcəyiniz soyuq kofe reseptlərini təqdim edirik:

Klassik buzlu frappe
Ərzaqlar: dabl espresso, 1/3 su stəkanı buz, 100 ml süd, şəkər və ya şokolad siropu.
Üzərinə: rəndələnmiş şokolad və kofe çəyirdəkləri.
Hazırlanması: buzu blenderdən keçirin və stəkana əlavə edin. Ayrı qabda espressonu, şəkər və ya şokolad siropunu, südü qarışdırın və çırpın. Qarışığı buzun üzərinə əlavə edin. Üzərinə şokolad parçaları və kofe çəyirdəkləri əlavə edin.

Şokoladlı və nanəli kofe
Ərzaqlar: 150 ml təzə dəmlənmiş filtr kofe, 100 qr qara şokolad, nanə siropu və vanilli dondurma.
Hazırlanması: şokoladı filtr kofenin içində, aşağı temperaturda əridin. Qarışığı bir az soyudun və nanə siropunu əlavə edin. Buzu əzib stəkana tökün. Qarışığı buzun üzərinə əlavə edin. Üzərinə dondurma qoyun. Nanə yarpaqları və qara şokoladla bəzəyin.

Bananlı kofe
Ərzaqlar: 350 ml sərt kofe, 100 qr şokoladlı dondurma, 1 banan, darçın, rəndələnmiş şokolad.
Hazırlanması: sərt kofeni hazırlayın, süzün və soyudun. Üzərinə dondurmanı əlavə edin. Bananı əzin və kofeli qarışığa əlavə edin. Qırılmış buzları stəkana tökün və üzərinə hazırladığınız qarışığı əlavə edin. Darçın və şokoladla bəzəyin.