Nəfəs Şeirlər 1-08-2023, 20:20

Ayrılıq

Çox küsüşdük bundan əvvəl.
Çox ayrıldıq, çox barışdıq.
Ayrılmağa, barışmağa,
Belə — belə biz alışdıq.

Biz küsəndə dünya qəmli,
Barışanda şad olardı
Barışmağa min bəhanə…
Hər dəfə bir ad olardı.

Guya səhvən zəng edərdik,
Mesajlar da səhv gedərdi.
Birimiz bərk «xəstələnər»…
Digərimiz zəng edərdi.

Danışardıq ordan-burdan,
Gülüşərdik, ağlayardıq.
Sevgimizin xatirinə
Söz-söhbəti bağlayardıq.

Beləcənə ömür sürər,
Çox da xoşbəxt yaşayardıq.
«Bitməz» deyib, sevgimizi
Sabahlara daşıyardıq.

İndi yenə küsüşmüşük,
Nə yazan var, nə zəng edən.
Sağalmışıq deyəsən biz,
Bəhanə yox,
Gedib gedən…