Nə fayda?

Gözlərin uzaqlara çox baxacaqsa,

Qoynunda boşluqlar uyuyacaqsa,

Hələ bu sevgin də dərd olacaqsa,

_Qəlbini kül edib sevsən, nə fayda?_

Səni ovudacaq sözlər yoxdursa,

Baş qoyub yatmağa dizlər yoxdursa,

Səni anlayacaq ürək kordursa,

_Ömrünü şam edib yansan, nə fayda?_

Xoş günlər yanından ötüb keçibsə,

Ruhun da əlindən cana gəlibsə,

Səni “sən” edənlər çoxdan gedibsə,

_Bir quru bədənlə qalsan, nə fayda?_

— Şamil Ənvəroğlu