Döymə qapısını qınaq olarsan .

Nahaqdan özünü aldatma bir də ,

Düşünmə sən mənə sınaq olarsan .

Bağlı ürəyimlə neynəyəcəksən ?

-Döymə qapısını qınaq olarsan .

Qaranquş kimidir ötəri hisslər ,

Havalar soyuyar uçub gedərsən .

Soyuq ürəyimdə hərarət olmaz ,

Başını götürüb qaçıb gedərsən .

Qalarsan yer ilə göy arasında ,

Bir sınıb sallanmış budaq olarsan .

Bağlı ürəyimlə neynəyəcəksən ?

- Döymə qapısını qınaq olarsan .

Qaralmış çırağam , dumanlı bir dağ ,

Məndən işıq düşməz yoluna , çıx get .

Mən də kövrəlirəm biraz sənin tək 

-baxdıqca bu məyyus halına , çıx get .

Heyifsən bir eşqə yamaq olarsan ,

Bağlı ürəyimlə neynəyəcəksən ?

- Döymə qapısını qınaq olarsan .

Vallah xeyir gəlməz sənə də məndən ,

Boranlı adamam , qışa düşərsən .

Dözməzsən bu qədər çətinliklərə ,

Gün gələr bunu da başa düşərsən .

Bəlkə boy atarsan , boyun görünməz,

Bir çiçək dibində alaq olarsan .

Bağlı ürəyimlə neynəyəcəksən ?

- Döymə qapısını qınaq olarsan .

Ürəyin isinməz buz ürəyimdən ,

Qəlbimə qar yağır , Sibirə bənzər .

Qaranlıq dünyamda sənə yer olmaz ,

Könlüm bir adamlıq qəbirə bənzər .

Ağlama , gözünün yaşına qurban ,

Bir gün qəbrim üstə qonaq olarsan ,

Bağlı ürəyimlə neynəyəcəksən ?

- Döymə qapısını qınaq olarsan ...

#Daşqın