İlahi, sən məni niyə yaratdın?

Mənimlə dərdimi bölən olmadı, 

Hamı çıxıb getdi, gələn olmadı. 

Bir nəfər qədrimi bilən olmadı,

İlahi, sən məni niyə yaratdın?

Ümidim hər şeydən üzülüb gedir, 

Gözümün yaşları süzülüb gedir, 

Ömrümün yaşları düzülüb gedir,

İlahi, sən məni niyə yaratdın?

Uşaqlıq illərim suç oldu getdi,

Gəncliyi görmədim, heç oldu getdi,

Bu cavan yaşlarım puç oldu getdi,

İlahi, sən məni niyə yaratdın?

Dərdim bir ömürdür, şəfa görmürəm, 

Günlər boşa gedir məna görmürəm, 

Heç kimdə bir zərrə vəfa görmürəm, 

İlahi, sən məni niyə yaratdın?

Çəkdiyim dərdlərə dözmür bu ürək, 

Qəsdimə dayanır hər yandan fələk. 

Dünyaya gəlmədən öləydim gərək, 

İlahi, sən məni niyə yaratdın?